23/06/17

A fin do mandilón

Compartir

Hoxe mesmo miña filla, de cinco anos, remata o ciclo de educación infantil
Acábase así para ela a 'era do mandilón', pois xa non o volverá ter que poñer de novo
Durante case a metade da súa vida, que logo se di, vestiu esa peza de roupa cada día de clase



Ao longo destes tres anos de infantil, a rapariga fixo bos amigos nas aulas
Algúns mesmo a convidaron á súa casa, e nós respondemos con reciprocidade
Pero non só adquiriu a base dos seus coñecementos académicos no colexio ao que vai
Noutros lugares, como nas bibliotecas ou en Preescolar na Casa, tamén puido aprender moito



No último curso Selma asistiu tamén a actividades extraescolares en Semente Lugo
Alí pasouno estupendamente, celebrando tanto o magosto coma o entroido ou os maios
O mesmo podemos falar de Espazo Artístico 10,  a súa academia de teatro e mais de danza




Agora que deixa atrás esta etapa da súa vida, sabe tanto como para ensinar ela mesma
-Encántalle xogar a ser a profesora, tanto cos bonecos como con outros nenos ou cos adultos-
Todas estas lembranzas da idade dourada da infancia ficarán para sempre no xardín da súa memoria


02/05/17

Os importantes señores de Natasha Lelenco

Compartir


'Adopta un señor importante' é o último proxecto da artista Natasha Lelenco
Durante meses, estas eminencias percorreron o país na procura de pais adoptivos
Tras pasaren por Boiro, Ourense ou Fisterra, os retratos aínda sen afillar chegaron a Lugo
Entre estes persoeiros egrexios figuran dende poderosos soberanos ata heroes cheos de medallas
Aqueles que sen a fortuna de ser acollidos nun novo fogar serán pasto das lapas na fogueira do San Xoán




Ademais de señores con máis ou menos ínfulas, tamén abundan as señoras importantes
Entre elas figura a cantante rusa Ala Pugachova, que vendeu máis de 250 millóns de discos




Ou Catalina de Boloña, unha personaxe relevante do Cinquecento e santa patroa das artes liberais
Outro persoeiro histórico presente é Dióxenes Laercio, biógrafo dos principais filósofos da antiga Grecia




Os cregos e mailos señores castos tamén ocupan un lugar salientable nesta serie
En total, a colección ascende a medio cento de retratos, dos que só 17 chegaron a Lugo




Na presentación da mostra, a madeira foi unha das cuestións que suscitaron un maior interese
Así, soubemos que os toros eran de piñeiro, de ciprés ou de sabugueiro, entre outras especies arbóreas 




A autora das pinturas, Natasha, tamén nos falou da súa propia historia
Contounos que de nena quedara orfa na súa Moldavia natal xunto coa súa irmá
Do mesmo xeito, na mostra pódense ver dous irmáns, un máis vello e outro máis novo
Dado que se procura que sigan xuntos, facilítanse os trámites a quen acolla ambos os dous




Trala presentación por parte da pintora, gozamos dun concerto de Lilí Berlín
O dúo cabareteiro formado por Suso Alonso e pola diva Blanca Cendán non defraudou
Ofreceron temas en alemán, en francés ou en español, como La vie en rose ou Al Uruguay!




As obras de Natasha permanecerán en La Ferretería Eventos & Co ata o 9 de maio
As que non sexan adoptadas arderán o mes vindeiro no lume purificador do solsticio de verán
Algunhas delas, como o heroe, o sacerdote ou Ala, xa foron acollidas, mentres o resto segue a agardar


18/04/17

Días de atraccións na Casa de Campo

Compartir


Gran parte das vacacións desta Pascua pasámolas na capital do país 'vecino'
Alí visitamos a Casa de Campo, un xardín con case dúas mil hectáreas de extensión
Nun dos seus límites encóntrase o Parque de Atraccións de Madrid, onde moito troulamos
Tras unha primeira 'rolda de contactos', xantamos nun precioso quiosco no medio das instalacións




Quen mellor o pasou foi a nosa filla, que quería subir a todas as atraccións
A primeira de todas foi a dos 'globos tolos', na zona para os cativos máis novos




Non o pasou tan ben Selma no 'tren da mina', unha pequena montaña rusa
Para compensar as emocións fortes, demos un tranquilo paseo en cepelín sobre o parque




Tamén paseamos en barca a través da xungla, unha das atraccións máis antigas do parque
A onde non accedemos foi a The Walking Dead Experience, baseada na famosa serie de zombis





Tampouco subimos ao Star Flyer, a 80 metros de altura
Pero si nos sacamos unha foto con Marshall, da Patrulla Canina




Aínda que non nos puidemos fotografar con Lurardo, que xa se despedía
Pero si tivemos a oportunidade de retratarnos xunto á casa de Bob Esponxa
E puidemos subir aos cabaliños, nun carrusel de época que databa dos anos 20




Outros días subimos ao teleférico dende o parque do Oeste
E tamén accedemos ás atraccións dun centro comercial en Arroyomolinos
Foron, en resumo, unhas xornadas inesquecibles de tempo estival en plena primavera